روس جیسے وسیع ملک میں علاقوں کا آبادی سے خالی ہونا ناقابل قبول ہے: صدر پوتن

روسی صدر ولادیمیر پوتن نے واضح کیا ہے کہ روس جیسے دنیا کے سب سے وسیع رقبے کے حامل ملک میں مختلف علاقوں کا آبادی سے خالی ہونا یا شہریوں کا نقل مکانی کرنا کسی صورت قابلِ قبول نہیں۔ حکومت کو تمام دور دراز خطوں میں ایسے موافق حالات پیدا کرنے ہوں گے کہ نچلی سطح پر نوجوان اپنے آبائی شہروں اور قصبوں میں رہیں، وہیں روزگار حاصل کریں اور اپنا مستقبل تعمیر کر سکیں۔

شہری منصوبہ بندی اور علاقائی ترقی کے شعبے سے وابستہ ماہرین اور نمائندوں کے اہم اجلاس سے خطاب کرتے ہوئے صدر ولادیمیر پوتن نے کہا کہ جدید ٹیکنالوجی، تیز رفتار انٹرنیٹ، مصنوعی ذہانت (AI) اور آئی ٹی کی جدید سہولیات سے فائدہ اٹھاتے ہوئے علاقائی ترقی کے لیے ایک متوازن اور جامع حکمتِ عملی اختیار کرنے کی شدید ضرورت ہے۔

صدر پوتن کے مطابق روس بھر میں 2 ہزار 160 ایسے اہم شہروں اور قصبوں کی نشاندہی کی گئی ہے جہاں ملک کی تقریباً 75 فیصد آبادی مقیم ہے۔ ان تمام علاقوں کے لیے ایک خصوصی ترقیاتی پروگرام تیار کیا گیا ہے جس کا بنیادی مقصد اقتصادی، سماجی اور بنیادی ڈھانچے (انفراسٹرکچر) کو مضبوط بناتے ہوئے کروڑوں شہریوں کے معیارِ زندگی کو بہتر بنانا ہے۔ انہوں نے زور دیا کہ نوجوانوں کو اپنے آبائی علاقوں اور دیہات میں رہنے کے لیے راغب کیا جائے، جس کے لیے منصوبوں پر منظم انداز میں کام جاری ہے۔

روسی صدر نے جدید کاری کے ساتھ ساتھ شہروں کی تاریخی اور منفرد ثقافتی شناخت محفوظ رکھنے پر خاص زور دیا۔ انہوں نے ہدایت کی کہ نئی تعمیرات اور ڈیجیٹل ٹیکنالوجی کے استعمال کے دوران تاریخی عمارتوں اور ثقافتی ورثے کا تحفظ یقینی بنایا جائے کیونکہ یہ روس کا قیمتی اثاثہ ہیں۔

خطاب کے دوران صدر پوتن نے خصوصی فوجی آپریشن (Special Military Operation) کے سابق فوجیوں کی بحالی پر بات کرتے ہوئے کہا کہ انہیں صرف عام شہری زندگی میں واپس لانا کافی نہیں، بلکہ انہیں نیا پیشہ اختیار کرنے اور کیریئر میں آگے بڑھنے کی تمام ضروری سہولیات میسر ہونی چاہئیں۔

مشرقِ بعید (Far East) اور ٹرانس بائیکال کے دور دراز علاقوں کا ذکر کرتے ہوئے انہوں نے کہا کہ حکومت ان خطوں پر خصوصی توجہ دے رہی ہے تاکہ وہاں لوگ روٹیشن کی بنیاد پر کام کرنے کے بجائے مستقل بنیادوں پر آباد ہوں۔ آخر میں صدر پوتن نے شہروں کی منظم ترقی کے لیے ایک جامع ‘ماسٹر پلان قانون’ کی حمایت کی تاکہ تعمیراتی اہداف اور نتائج کا واضح تعین ہو سکے۔