روس اور پاکستان کے تعلقات کامیابی کے ساتھ فروغ پا رہے ہیں: ولادیمیر پوتن

پاکستان کے یومِ آزادی کے پرمسرت موقع پر روسی صدر ولادیمیر پوتن اور بحرین کے ولی عہد و وزیراعظم شہزادہ سلمان بن حمد الخلیفہ نے صدرِ مملکت آصف علی زرداری، وزیراعظم محمد شہباز شریف اور پاکستانی قوم کے نام الگ الگ تہنیتی پیغامات ارسال کیے ہیں۔ روس کے صدر ولادیمیر پوتن نے اپنے پیغام میں پاکستانی عوام کو دل کی گہرائیوں سے مبارکباد پیش کرتے ہوئے امن، خوشحالی اور نیک تمناؤں کا اظہار کیا۔

روسی صدر نے اپنے پیغام میں اس بات پر زور دیا کہ روس اور پاکستان کے تعلقات انتہائی کامیابی کے ساتھ آگے بڑھ رہے ہیں اور دونوں ممالک سیاسی، تجارتی، اقتصادی اور انسانی ہمدردی کے شعبوں میں بہترین اور نتیجہ خیز تعاون جاری رکھے ہوئے ہیں۔ ولادیمیر پوتن نے مزید کہا کہ اہم عالمی اور علاقائی امور پر بھی دونوں ممالک کا باہمی تعاون جاری ہے اور انہیں یقین ہے کہ دونوں دوست ممالک اپنے عوام کے وسیع تر مفاد میں دوطرفہ شراکت داری کے تمام شعبوں کو مزید وسعت اور استحکام دیں گے۔ دوسری جانب بحرین کے ولی عہد اور وزیراعظم شہزادہ سلمان بن حمد الخلیفہ نے بھی صدر زرداری اور وزیراعظم شہباز شریف کو مبارکباد کا پیغام بھیج کر نیک خواہشات کا اظہار کیا۔