یوکرین بالآخر اپنے مغربی علاقے کھو دے گا: صدر پوتن کا دعویٰ

روسی صدر ولادیمیر پوتن نے دعویٰ کیا ہے کہ یوکرین مستقبل میں اپنے وہ مغربی علاقے بھی کھو دے گا جو ماضی میں پولینڈ، ہنگری اور رومانیہ کا حصہ تھے۔ روسی بحریہ کے اہلکاروں سے ملاقات کے دوران گفتگو کرتے ہوئے صدر پوتن نے کہا کہ اس عمل میں کتنا وقت لگے گا اس کا حتمی تعین ممکن نہیں، لیکن تاریخ آخرکار ہر چیز کو اپنی اصل جگہ لے آئے گی۔ انہوں نے مؤقف اختیار کیا کہ روس ہی یوکرین کی علاقائی سالمیت کا واحد حقیقی ضامن تھا، تاہم کیف حکومت نے روس کو اپنا دشمن قرار دینے کا غلط فیصلہ کیا۔ ان کے مطابق، یوکرینی قیادت نے یہ سمجھ لیا تھا کہ روس کے خلاف جانا ان کے لیے فائدہ مند ہوگا، لیکن وقت کے ساتھ نتائج سامنے آ جائیں گے۔