راولپنڈی میں بارش کی صورتحال کو وزیر اعلیٰ پنجاب خود مانیٹر کر رہی ہیں: عظمیٰ بخاری

راولپنڈی/لاہور: صوبائی وزیر اطلاعات پنجاب عظمیٰ بخاری نے کہا ہے کہ راولپنڈی میں حالیہ بارش کے بعد پیدا ہونے والی صورتحال کو وزیراعلیٰ پنجاب مریم نواز شریف خود براہِ راست مانیٹر کر رہی ہیں۔

اپنے ایک جاری کردہ بیان میں عظمیٰ بخاری نے بتایا کہ ریسکیو 1122، واسا (WASA)، پیرا فورس اور ضلعی انتظامیہ کا تمام فیلڈ عملہ سڑکوں اور نشیبی علاقوں میں موجود ہے تا کہ شہریوں کو درپیش مشکلات کا فوری حل ممکن بنایا جا سکے۔

صوبائی وزیر نے کہا کہ راولپنڈی میں واسا اور دیگر تمام متعلقہ اداروں کے پاس نکاسی آب کے لیے تمام ضروری وسائل اور مشینری موجود ہے۔ انہوں نے شہریوں کو یقین دہانی کرائی کہ بارش تھمنے کے ساتھ ہی نکاسی کا کام مکمل کر لیا جائے گا اور اگلے چند گھنٹوں کے اندر راولپنڈی کی تمام اہم شاہراہیں اور علاقے پانی سے کلیئر کر دیے جائیں گے۔