مسلم دنیا کی 500 بااثر شخصیات کی فہرست جاری، شہباز شریف اور فیلڈ مارشل پہلے نمبر پر

اردن کے معروف تحقیقی ادارے رائل اسلامک اسٹریٹجک اسٹڈیز سینٹر نے مسلم دنیا کی 500 بااثر ترین شخصیات کی سالانہ فہرست جاری کر دی ہے، جس میں پاکستان کے وزیراعظم شہباز شریف اور فیلڈ مارشل عاصم منیر کو مشترکہ طور پر پہلی پوزیشن پر رکھا گیا ہے۔

جاری کردہ فہرست کے مطابق تاریخ میں پہلی مرتبہ عالمِ اسلام کی پانچ اہم شخصیات کو مشترکہ طور پر پہلے نمبر کے لیے منتخب کیا گیا ہے، جن میں وزیراعظم شہباز شریف اور فیلڈ مارشل عاصم منیر کے ہمراہ سعودی فرمانروا شاہ سلمان بن عبدالعزیز، سعودی ولی عہد شہزادہ محمد بن سلمان اور ترک صدر رجب طیب اردوان بھی شامل ہیں۔

درجہ بندی کے مطابق ایران کے سپریم لیڈر آیت اللہ مجتبیٰ خامنہ ای اس فہرست میں چوتھے نمبر پر موجود ہیں، جبکہ اردن کے شاہ عبداللہ دوم نے پانچویں اور قطر کے امیر شیخ تمیم بن حمد آل ثانی نے چھٹی پوزیشن حاصل کی ہے۔

عالمی سطح پر نمایاں مسلم رہنماؤں میں متحدہ عرب امارات کے صدر شیخ محمد بن زاید، ملائیشیا کے وزیراعظم انور ابراہیم اور مراکش کے شاہ محمد ششم بھی بااثر ترین مسلم شخصیات کی فہرست میں نمایاں مقام پر شامل ہیں۔ اس کے علاوہ انڈونیشیا کے صدر پرابووو سوبیانتو، مصر کے صدر عبدالفتاح السیسی، فلسطینی صدر محمود عباس اور شام کے صدر احمد الشرع کو بھی مسلم دنیا کی بااثر شخصیات میں جگہ دی گئی ہے۔

پاکستان سے دیگر نمایاں شخصیات میں عالمِ اسلام کے ممتاز عالم دین مفتی محمد تقی عثمانی اور معروف مبلغ مولانا طارق جمیل بھی 500 بااثر مسلم شخصیات کی اس فہرست میں شامل ہیں۔

دوسری جانب خصوصی اعزازات کے تحت غزہ کے کمال عدوان ہسپتال کے سابق سربراہ ڈاکٹر حسام ابو صفیہ کو انسانی خدمات اور استقامت پر سال کی نمایاں مرد شخصیت قرار دیا گیا ہے، جبکہ ایران کے شہر میناب میں سکول پر حملے میں محفوظ رہنے والی کمسن طالبہ فاطمہ زہرا شیخ آبادی کو سال کی نمایاں خاتون شخصیت قرار دیا گیا ہے۔