سالک حسین کرپشن کے الزامات بارے ثبوت پیش کریں یا معافی مانگیں: عظمیٰ بخاری

وزیر اطلاعات پنجاب عظمیٰ بخاری نے وفاقی وزیر چوہدری سالک حسین کے وزیراعلیٰ پنجاب مریم نواز سے متعلق بیان پر سخت ردعمل دیتے ہوئے مطالبہ کیا ہے کہ سالک حسین وزیراعلیٰ کے نوٹس کا باضابطہ جواب دیں، کرپشن کے ثبوت پیش کریں یا پھر معافی مانگیں۔

صوبائی دارالحکومت لاہور سے جاری اپنے تنقیدی بیان میں عظمیٰ بخاری نے کہا کہ وفاقی وزیر اور اتحادی حکومت کا حصہ ہونے کے باوجود بغیر کسی شواہد کے بے بنیاد الزام تراشی کرنا چوہدری سالک حسین کو زیب نہیں دیتا۔ انہوں نے کہا کہ سالک حسین نے پہلے خود ہی ڈپٹی کمشنر گجرات کی تعیناتی کی سفارش کا اعتراف کیا تھا، تاہم اب وہ اپنے بیان سے پیچھے ہٹ رہے ہیں۔ سرکاری عہدے کی سہولیات بھی حاصل کرنا اور ساتھ ہی بے بنیاد الزامات لگانا کسی صورت قابلِ قبول نہیں اور یوٹرن لینے کی پالیسی اب نہیں چلے گی۔

وزیر اطلاعات پنجاب کا مزید کہنا تھا کہ چوہدری سالک حسین کے اپنے بھائی بھی گزشتہ روز ان کے الزامات کو علی الاعلان مسترد کر چکے ہیں، جبکہ خود سالک حسین اعتراف کر چکے ہیں کہ ان کے پاس کرپشن کا کوئی ثبوت نہیں ہے۔ عظمیٰ بخاری نے واضح کیا کہ وزیراعلیٰ مریم نواز نے پنجاب میں کھربوں روپے کے ریکارڈ ترقیاتی پروجیکٹس مکمل کیے ہیں جن میں مخالفین بھی ایک دھیلے کی بے ضابطگی ثابت نہیں کر سکے، اس لیے الماریاں بھرنے کے الزامات پر چوہدری سالک حسین کو جواب دہ ہونا پڑے گا۔