امریکا : فیفا فٹبال ورلڈ کپ کی میزبانی کے باوجود ہوٹل بکنگ توقعات سے کم، بڑی تعداد میں ہوٹل مالکان مایوس

امریکا میں فٹبال کے عالمی کپ سے محض چند ہفتے قبل ہوٹلنگ کے شعبے کو غیر یقینی صورتحال کا سامنا ہے، جہاں بکنگ کی شرح ابتدائی اندازوں سے نمایاں طور پر کم ریکارڈ کی گئی ہے۔

امریکی ہوٹل و لاجنگ ایسوسی ایشن کی جانب سے جاری سروے کے مطابق، 11 بڑے میزبان شہروں میں تقریباً 80 فیصد ہوٹل مالکان نے بتایا کہ بکنگ توقعات سے کم رہی ہے۔ سروے میں شامل تقریباً 65 فیصد افراد نے ویزا پابندیوں اور عالمی سیاسی حالات کو کم طلب کی بڑی وجوہات قرار دیا۔

ایسوسی ایشن کی صدر روزانا مائیٹا کے مطابق ابتدائی امیدوں کے برعکس کئی عوامل نے صورتحال کو متاثر کیا، تاہم آنے والے دنوں میں بہتری کے امکانات اب بھی موجود ہیں، بشرطیکہ بیرونِ ملک سے آنے والے شائقین کے لیے آسان اور خوشگوار ماحول فراہم کیا جائے۔

رپورٹ کے مطابق بعض شہروں میں صورتحال زیادہ تشویشناک ہے، جہاں بکنگ معمول کے مہینوں جون اور جولائی سے بھی کم رہی۔ کئی شہروں میں ہوٹل مالکان نے اس بڑے ایونٹ کو غیر مؤثر قرار دیا۔

ماہرین کا کہنا ہے کہ ٹکٹوں کی بلند قیمتیں، سفری اخراجات اور انتظامی رکاوٹیں بھی شائقین کی دلچسپی میں کمی کا باعث بن رہی ہیں، جس سے مجموعی طور پر مہمان نوازی کے شعبے پر منفی اثرات مرتب ہو رہے ہیں۔