امریکا اور برطانیہ آبنائے ہرمز میں بحری اتحاد کی تیاری کر رہے ہیں: امریکی میڈیا

امریکی نیوز ویب سائٹ “ایگزیوس” کے مطابق امریکا اور برطانیہ اگلے ہفتے لندن میں ایک اعلیٰ سطحی اجلاس منعقد کرنے کی منصوبہ بندی کر رہے ہیں، جس کا مقصد آبنائے ہرمز میں تجارتی جہاز رانی کے تحفظ اور عالمی توانائی منڈیوں میں استحکام کے لیے بین الاقوامی اتحاد کا قیام ہے۔ وائٹ ہاؤس کے ایک عہدیدار نے اجلاس کے حوالے سے مشترکہ منصوبہ بندی کی تصدیق کی ہے، جس میں مغربی ممالک اور خطے کی اہم شخصیات سمیت امریکی وزیر دفاع پیٹ ہیگستھ اور جوائنٹ چیفس آف اسٹاف کے چیئرمین جنرل ڈین کین کی شرکت بھی متوقع ہے۔ امریکی حکمت عملی کے تحت واشنگٹن اپنے اتحادیوں سے بارودی سرنگیں صاف کرنے والے جہاز، جنگی بحری جہاز اور ڈرونز فراہم کرنے کی اپیل کرے گا تاکہ بحری راستوں کو محفوظ اور ایران کیساتھ تنازع کی صورت میں جہاز رانی بحال رکھی جا سکے۔