امریکا نے ایران کی 130 ملین ڈالر سے زائد مالیت کی کرپٹو کرنسی منجمد کر دی

امریکا کی نو منتخب ٹرمپ انتظامیہ نے ایران کے خلاف معاشی شکنجہ مزید سخت کرتے ہوئے 130 ملین ڈالر (13 کروڑ ڈالر) سے زائد مالیت کی کرپٹو کرنسی منجمد کرنے کا اعلان کیا ہے۔ امریکی محکمہ خزانہ کی جانب سے جاری کردہ باضابطہ بیان کے مطابق، منجمد کی گئی اس ڈیجیٹل کرنسی کا براہِ راست تعلق ایران سے تھا، جس کے بعد ایران کے مرکزی بینک (Central Bank of Iran) سے منسلک متعدد کرپٹو والٹس پر فوری طور پر سخت پابندیاں عائد کر دی گئی ہیں۔

امریکی سیکرٹری خزانہ نے اس کارروائی کی تصدیق کرتے ہوئے سخت موقف اپنایا اور اپنے بیان میں کہا کہ ایران کی جانب سے کی جانے والی ہر قسم کی غیر قانونی مالیاتی سرگرمیوں کے خلاف امریکی کارروائی بلا تعطل جاری رہے گی۔ امریکا ایرانی حکومت کو کسی بھی قسم کے غیر قانونی ذرائع سے حاصل ہونے والی آمدنی اور فنڈز تک رسائی حاصل کرنے سے روکنے کے لیے مکمل طور پر پرعزم ہے۔”

مالیاتی ماہرین کا کہنا ہے کہ ٹرمپ انتظامیہ کے اس جارحانہ اقدام کا مقصد ایرانی معیشت پر دباؤ بڑھانا اور بلاک چین ٹیکنالوجی کے ذریعے پابندیوں سے بچنے کی ایرانی کوششوں کو ناکام بنانا ہے۔ اس کارروائی سے دونوں ممالک کے مابین جاری کشیدگی میں مزید اضافے کا خدشہ پیدا ہو گیا ہے۔