ایرانی ڈرون حملے میں ایک اور امریکی فوجی ہلاک، سینٹ کام کی تصدیق

امریکی سینٹرل کمانڈ (سینٹ کام) نے مشرقِ وسطیٰ میں ایرانی حملوں کے نتیجے میں اپنے ایک اور فوجی اہلکار کی ہلاکت کی باقاعدہ تصدیق کر دی ہے۔ سینٹ کام کی جانب سے جاری کردہ ایک پریس ریلیز کے مطابق، یہ واقعہ 18 جولائی کو شمالی عراق میں پیش آیا جہاں ایک امریکی فوجی اہلکار کارروائی کے دوران مارا گیا۔ امریکی فوج کا کہنا ہے کہ مذکورہ فوجی ایران کے ایک یکطرفہ ڈرون حملے کا شکار ہوا، جس کے بعد جائے وقوعہ پر شروع کیے گئے سرچ آپریشن کے دوران امریکی اہلکاروں کو لاپتہ فوجی کی انسانی باقیات مل گئی ہیں۔ واضح رہے کہ خطے میں امریکی تنصیبات پر حملوں میں حالیہ دنوں میں شدید اضافہ دیکھا گیا ہے، اور اس سے قبل بھی امریکی سینٹرل کمانڈ نے اردن میں ایران کے بیلسٹک میزائل حملوں کے نتیجے میں اپنے 2 فوجیوں کی ہلاکت اور متعدد کے زخمی ہونے کی تصدیق کی تھی۔