ٹرمپ انتظامیہ ایران جنگ جاری رکھتی ہے تو کانگریس مالی وسائل کی فراہمی روک دے، امریکی سینیٹر

امریکی ڈیموکریٹ سینیٹر ایڈ مارکی نے ایران کے ساتھ جاری فوجی تنازع پر صدر ڈونلڈ ٹرمپ کو سخت تنقید کا نشانہ بناتے ہوئے امریکی کانگریس سے مطالبہ کیا ہے کہ اگر انتظامیہ بمباری اور جنگ جاری رکھتی ہے تو اس کے لیے مالی وسائل کی فراہمی کو فوری طور پر روک دیا جائے۔

سماجی رابطے کی ویب سائٹ “ایکس” (سابقہ ٹویٹر) پر جاری کردہ اپنے ایک سخت بیان میں سینیٹر ایڈ مارکی نے کہا کہ صدر ٹرمپ ایک بار پھر ایران پر حملے کر رہے ہیں اور دعویٰ کر رہے ہیں کہ جنگ بندی ختم ہو چکی ہے، جبکہ حقیقت یہ ہے کہ کانگریس پہلے ہی دو جماعتی (بائی پارٹیسن) بنیادوں پر اس لاپروا جنگ کے خاتمے کے حق میں اپنا ووٹ دے چکی ہے۔ انہوں نے مزید زور دیتے ہوئے کہا کہ اگر ٹرمپ بمباری کا سلسلہ نہیں روکتے تو کانگریس کو چاہیے کہ وہ اس جنگ کے لیے فنڈنگ کا بائیکاٹ کرے۔ ایڈ مارکی کا کہنا تھا کہ وہ خود ٹرمپ کی جنگی مشینری کے اخراجات کم کرنے کی کوششوں کی قیادت کر رہے ہیں اور اس جنگ کو اب ہر صورت فوری طور پر ختم ہونا چاہیے۔