امریکا کا ایران کے مطالبات قبول کرنے سے انکار

امریکی وزیرِ خارجہ مارکو روبیو نے کہا ہے کہ صدر ڈونلڈ ٹرمپ ہر عالمی مسئلے کا سفارتی حل نکالنے کے خواہاں ہیں اور اگر کسی تنازع کا سفارتی حل ممکن ہوا تو اس راستے کو ضرور آزمایا جائے گا۔ تاہم، ایران کی موجودہ صورتِ حال پر گفتگو کرتے ہوئے امریکی وزیرِ خارجہ کا کہنا تھا کہ تہران کی جانب سے پیش کیے گئے بعض مطالبات غیر معقول، حقیقت سے دور اور بالکل ناقابلِ قبول ہیں۔ مارکو روبیو نے واضح کیا کہ امریکہ کسی بھی صورت ایران کو تباہ کن اور مہلک ہتھیار حاصل کرنے کی اجازت نہیں دے سکتا۔ انہوں نے اس تاثر کو بھی مسترد کر دیا کہ امریکی انتظامیہ کے فیصلے سیاسی مفادات پر مبنی ہیں اور کہا کہ صدر ٹرمپ نے ایران کے خلاف جو بھی کارروائیاں کی ہیں وہ کسی سیاسی فائدے کے لیے نہیں بلکہ قومی و عالمی سیکیورٹی کو مدِ نظر رکھتے ہوئے کی ہیں۔