بجلی کی 3 کمپنیوں کی نجکاری: پاکستانی اور ترک سرمایہ کاروں کا جوائنٹ وینچر

پاکستان میں بجلی کی تین بڑی تقسیم کار کمپنیوں (ڈسکوز) کی نجکاری پر عملدرآمد کے لیے پاکستانی اور ترک سرمایہ کاروں نے بڑا مشترکہ اتحاد قائم کر لیا ہے۔ ترکیہ کے معروف صنعتی گروپ ‘چنگیز ہولڈنگ’ نے پاکستان کے 5 نامور گروپس—فاطمہ گروپ، آرٹسٹک ملینرز، دین گروپ، فضل گروپ اور لیک سٹی ہولڈنگز—کے ساتھ استنبول میں سٹریٹجک جوائنٹ وینچر پر دستخط کیے ہیں، جس کا بنیادی ہدف فیصل آباد الیکٹرک سپلائی کمپنی (فیسکو)، گوجرانوالہ الیکٹرک سپلائی کمپنی (گیپکو) اور اسلام آباد الیکٹرک سپلائی کمپنی (آئیسکو) کی خریداری کے لیے بولیوں میں حصہ لینا ہے۔ حکومتِ پاکستان کی جانب سے ڈسٹری بیوشن و ٹرانسمیشن لاسز میں کمی اور صارفین پر اضافی بوجھ ختم کرنے کے لیے پہلے مرحلے میں ان تینوں ڈسکوز کو پرائیویٹائزیشن کے لیے پیش کیا گیا ہے، جو مجموعی طور پر ڈیڑھ کروڑ کے قریب صارفین کو بجلی فراہم کرتی ہیں۔ اس نئے مشترکہ اتحاد کے پاس 1 لاکھ 45 ہزار سے زائد ملازمین کی افرادی قوت اور توانائی، انفراسٹرکچر، ٹیکسٹائل اور پاور ڈسٹری بیوشن کا وسیع عالمی و مقامی تجربہ موجود ہے، جس کے ذریعے جدید ٹیکنالوجی، ڈیجیٹل بلنگ اور بہترین ایڈمنسٹریشن کی بدولت نقصانات اور بجلی کی غیر ضروری بندش کو کنٹرول کرنے میں مدد ملے گی۔