امریکا کا عراق سے ایران کیساتھ بیشتر سرحدی گزر گاہیں بند کرنے کا مطالبہ

امریکہ نے ایران پر معاشی دباؤ بڑھانے کی سخت پالیسی کے تحت عراق سے ایران کے ساتھ متصل بیشتر سرحدی گزرگاہیں فوری طور پر بند کرنے کا مطالبہ کر دیا ہے۔ عراقی وزیرِ خارجہ فواد حسین نے ‘الجزیرہ’ کو دیے گئے ایک انٹرویو میں تصدیق کی ہے کہ امریکی محکمہ خزانہ نے عراق سے ایران سے ملحقہ تمام بارڈر کراسنگز کو بند کر کے صرف 2 گزرگاہیں کھلی رکھنے کی درخواست کی ہے، جن میں سے ایک کردستان کے خطے میں واقع ہے۔ عراقی وزیرِ خارجہ کا کہنا تھا کہ دونوں ممالک کے مابین متعدد سرکاری و غیر سرکاری سرحدی راستے قائم ہیں جنہیں ایک دم مکمل طور پر بند کرنا انتہائی دشوار ہوگا اور اس فیصلے سے خود عراقی معیشت بھی شدید متاثر ہو سکتی ہے۔ انہوں نے مزید بتایا کہ امریکی انتظامیہ اب بھی بارڈرز کی بندش پر مسلسل زور دے رہی ہے، تاہم اس حساس معاملے پر واشنگٹن کے ساتھ سفارتی سطح پر مذاکرات کا سلسلہ جاری ہے۔