ایرانی سپریم لیڈر کے مذاکرات میں اپنی سرگرمیاں بڑھانے کے اشارے ملے ہیں: روبیو

امریکی وزیرِ خارجہ مارکو روبیو نے انکشاف کیا ہے کہ ایران کے ساتھ جاری سفارتی رابطوں میں ایسے واضح اشارے ملے ہیں جن سے معلوم ہوتا ہے کہ ایران کے سپریم لیڈر اب زیادہ فعال (ایکٹو) کردار ادا کر رہے ہیں اور مذاکرات کے عمل میں انہوں نے اپنی سرگرمیاں بڑھا دی ہیں۔

عرب نشریاتی ادارے ‘الجزیرہ’ کے مطابق، امریکی قانون سازوں سے اہم گفتگو کرتے ہوئے وزیرِ خارجہ مارکو روبیو کا کہنا تھا کہ ایران کے ساتھ کسی بھی قسم کے مذاکرات کو آگے بڑھانے کے لیے ‘آبنائے ہرمز’ کو جہاز رانی کے لیے کھولنا پہلی اور بنیادی شرط ہے۔ انہوں نے واضح کیا کہ اگر ایران افزودہ یورینیم سے دستبردار ہو جاتا ہے اور اپنے جوہری پروگرام سے متعلق دیگر اہم معاملات کو طے کرنے پر رضا مند ہوتا ہے، تو اس کے بعد ہی اس پر عائد اقتصادی پابندیوں میں نرمی لائی جا سکتی ہے۔

امریکی وزیرِ خارجہ نے جاری سفارتی عمل کے حوالے سے بعض اہم پہلوؤں پر روشنی ڈالی مارکو روبیو کے مطابق، ایران کے ساتھ موجودہ بات چیت میں جوہری پروگرام کے ایسے پہلو اور شقیں بھی زیرِ بحث آ سکتی ہیں جن پر تہران ماضی میں کسی بھی قسم کی گفتگو کرنے سے صاف انکار کرتا رہا ہے۔امریکی انتظامیہ یہ دیکھ رہی ہے کہ ایران کے روایتی مؤقف میں اب بعض مخصوص معاملات پر بات چیت کے حوالے سے ممکنہ لچک دیکھی جا رہی ہے

ایرانی رویے میں تبدیلی کے باوجود، امریکی وزیرِ خارجہ نے کسی بھی حتمی نتیجے پر پہنچنے کے حوالے سے محتاط انداز اپنایا ہے:

“اس بات کی کوئی بھی ضمانت نہیں دی جا سکتی کہ ایران کے ساتھ جاری یہ مذاکرات بالآخر کسی ایسے حتمی معاہدے پر منتج ہوں گے جو امریکا کے لیے مکمل طور پر قابلِ قبول ہو۔ کسی بھی حتمی اور پائیدار معاہدے تک پہنچنے کے امکانات کے بارے میں ابھی کوئی یقین دہانی نہیں کرائی جا سکتی۔”

جغرافیائی سیاسی ماہرین کے مطابق، خطے میں جاری حالیہ فوجی کشیدگی کے بعد امریکی وزیرِ خارجہ کا یہ بیان انتہائی اہمیت کا حامل ہے، جو یہ ظاہر کرتا ہے کہ پسِ پردہ سفارتی چینلز اب بھی متحرک ہیں۔