امریکا جلد آبنائے ہرمز کا کنٹرول سنبھال کر دنیا سے معاوضہ وصول کریگا: ٹرمپ

امریکی صدر ڈونلڈ ٹرمپ نے اعلان کیا ہے کہ امریکا جلد ہی اسٹریٹجک اہمیت کی حامل آبی گزرگاہ ‘آبنائے ہرمز’ (Strait of Hormuz) کا مکمل کنٹرول سنبھال لے گا اور اس کی حفاظت کے عوض دنیا بھر سے معاوضہ بھی وصول کرے گا۔ امریکی نشریاتی ادارے کو دیے گئے ایک انٹرویو میں صدر ڈونلڈ ٹرمپ کا کہنا تھا کہ امریکا آبنائے ہرمز کا باقاعدہ “محافظ” بننے جا رہا ہے، لہٰذا اس اہم سمندری راستے کے تحفظ کے بدلے امریکا کو مالی معاوضہ ملنا چاہیے۔ انہوں نے واضح کیا کہ دنیا کے کئی ممالک انتہائی خوشحال اور امیر ہیں، اس لیے وہ یہ توقع ہرگز نہ رکھیں کہ امریکا ان کی تجارتی گزرگاہوں کے لیے یہ چوکیداری مفت میں کرے گا، آبنائے ہرمز کے تحفظ کی قیمت ہر صورت ادا کرنی ہوگی۔

انٹرویو کے دوران صدر ٹرمپ نے ایران کے حوالے سے سخت موقف اپناتے ہوئے دعویٰ کیا کہ امریکا اور ایران کے درمیان ماضی میں ایک معاہدہ طے پا چکا تھا لیکن ایران نے اس کی خلاف ورزی کی۔ ان کا مزید کہنا تھا کہ ایران کے ساتھ اب تک تقریباً دس معاہدے ہو چکے ہیں اور ہر بار ایرانی قیادت نے وعدہ خلافی کی ہے، اسی لیے اب امریکا ایران کے خلاف انتہائی سخت اور حتمی اقدامات اٹھائے گا۔ امریکی صدر نے دعویٰ کیا کہ امریکا کے ساتھ جاری حالیہ جنگ میں ایران کو “عبرت ناک شکست” کا سامنا کرنا پڑا ہے، جس کے نتیجے میں ایران کی بحری، فضائی اور میزائل حملوں کی صلاحیتیں تقریباً مکمل طور پر تباہ ہو چکی ہیں۔