امریکی صدر نے کینیڈا سے درآمد ہونے والی بیشتر اشیاء پر 50 فیصد ٹیرف عائد کردیا

امریکی صدر ڈونلڈ ٹرمپ نے کینیڈا سے درآمد ہونے والی بیشتر اشیاء پر 50 فیصد ٹیرف عائد کر دیا ہے۔ اپنے فیصلے کا دفاع کرتے ہوئے صدر ٹرمپ کا کہنا تھا کہ کینیڈا طویل عرصے سے امریکی گاڑیوں اور ڈیری مصنوعات کے ساتھ غیر منصفانہ تجارتی سلوک کر رہا ہے۔ ٹرمپ انتظامیہ کے ایک سینئر عہدیدار نے صحافیوں کو بریفنگ دیتے ہوئے بتایا کہ کینیڈا ان چند ممالک میں شامل تھا جنہوں نے امریکی ٹیرف پالیسیوں کے جواب میں جوابی اقدامات کیے تھے، لہٰذا اسے اس طرزِ عمل پر جواب دہ ٹھہرانا انتہائی ضروری ہو گیا تھا۔

عہدیدار نے نام ظاہر نہ کرنے کی شرط پر انکشاف کیا کہ صدر ٹرمپ نے اس فیصلے کو قانونی شکل دینے کے لیے 1930 کے ٹریڈ ایکٹ کے سیکشن 338 کے تحت تین اہم اعلانات پر دستخط کر دیے ہیں۔ واضح رہے کہ گزشتہ سال بعض ڈیموکریٹ ارکانِ کانگریس نے اس قانونی شق کو ختم کرنے کی تجویز پیش کی تھی، کیونکہ ان کا خدشہ تھا کہ ٹرمپ اس کا استعمال عالمی اور ملکی معیشت کو غیر مستحکم کرنے کے لیے کر سکتے ہیں۔ اس نئے 50 فیصد ٹیرف سے توانائی کی مصنوعات، پوٹاش، مچھلی اور اہم معدنیات کو مستثنیٰ رکھا گیا ہے، تاہم اس میں وہ تمام اشیاء شامل کی گئی ہیں جنہیں اس سے قبل امریکا، میکسیکو، کینیڈا تجارتی معاہدے (USMCA) کے تحت درآمدی ٹیکس سے استثنیٰ حاصل تھا۔