امریکا نے ایرانی بندرگاہوں اور ساحلی علاقوں کی ناکہ بندی دوبارہ شروع کر دی

مشرقِ وسطیٰ میں بڑھتی ہوئی کشیدگی کے درمیان امریکی فوج نے ایک بار پھر ایران کی بندرگاہوں اور ساحلی علاقوں کی سخت بحری ناکہ بندی کا آغاز کر دیا ہے۔ سماجی رابطے کی ویب سائٹ ایکس (سابقہ ٹوئٹر) پر جاری کردہ ایک باضابطہ بیان میں امریکی سینٹرل کمانڈ (سینٹ کام) نے تصدیق کی ہے کہ ایرانی بندرگاہوں اور ساحلی علاقوں کی طرف جانے اور وہاں سے آنے والے تمام بحری جہازوں کی ناکہ بندی دوبارہ شروع کر دی گئی ہے۔ امریکی فوج کے مطابق، اس وقت مشرقِ وسطیٰ کے خطے میں امریکا کے 20 سے زائد بحری جنگی جہاز اور سیکڑوں کی تعداد میں جدید ترین لڑاکا طیارے آپریشنل پوزیشن میں موجود ہیں۔ سینٹ کام نے مزید واضح کیا کہ امریکی افواج خطے میں پوری طرح چوکس ہیں اور کسی بھی امکانی صورتحال یا جوابی کارروائی سے نمٹنے کے لیے ہر وقت تیار ہیں۔