آبنائے ہرمز عالمی گزر گاہ، کوئی ٹول ٹیکس وصول نہیں کر سکتا: امریکا کا واضح پیغام

امریکی وزیر خارجہ مارکو روبیو نے کہا ہے کہ کسی بھی ملک کو آبنائے ہرمز سے گزرنے والے تجارتی جہازوں پر ٹول یا فیس وصول کرنے کی اجازت نہیں دی جا سکتی۔ متحدہ عرب امارات کے دارالحکومت ابوظہبی میں صحافیوں سے گفتگو کرتے ہوئے انہوں نے واضح کیا کہ آبنائے ہرمز ایک بین الاقوامی آبی گزرگاہ ہے اور بین الاقوامی قانون کے تحت کسی بھی ملک کو اس پر کسی قسم کا ٹیکس، ٹول یا فیس عائد کرنے کا کوئی قانونی حق حاصل نہیں ہے۔ امریکی وزیر خارجہ کا کہنا تھا کہ اس موقف پر خلیجی خطے کے تمام ممالک کا مکمل اتفاق ہے، اس لیے اس معاملے پر یہاں کسی کو قائل کرنے کی ضرورت نہیں۔

مارکو روبیو نے خطے کی سیکیورٹی صورتحال کا ذکر کرتے ہوئے مزید کہا کہ جب تک ایران کے حمایت یافتہ مسلح گروہ عراق سے میزائل اور ڈرون حملے جاری رکھیں گے، تب تک مشرق وسطیٰ میں تنازع کا مکمل خاتمہ ممکن نہیں ہو سکے گا۔ انہوں نے زور دیا کہ یہ سیکیورٹی چیلنجز ایران کے ساتھ جاری سفارتی مذاکرات میں بھی زیر بحث لائے جائیں گے۔ امریکی وزیر خارجہ نے تہران حکومت کو مشورہ دیا کہ اگر ایران ایک انقلابی تحریک کے طور پر کام کرنے کے بجائے ایک عام اور ذمہ دار ریاست بننے کا فیصلہ کرے، تو اس کے لیے معاشی ترقی اور خوشحالی کے بڑے مواقع پیدا ہو سکتے ہیں۔ واضح رہے کہ امریکی وزیر خارجہ نے منگل کے روز متحدہ عرب امارات سے اپنے خلیجی ممالک کے اہم دورے کا آغاز کیا ہے، جس کے اگلے مراحل میں وہ کویت اور بحرین کا دورہ بھی کریں گے