حکومت کا پاکستان پٹرولیم لمیٹڈ پر کنٹرول مزید مضبوط، شیئر ہولڈنگ میں اضافہ

پاکستان پٹرولیم لمیٹڈ (PPL) نے سپریم کورٹ آف پاکستان کے حالیہ فیصلے کی روشنی میں پاکستان اسٹاک ایکسچینج (PSX) کو باضابطہ طور پر آگاہ کر دیا ہے کہ کمپنی کے شیئرز میں وفاقی حکومت کی ملکیت میں نمایاں اضافہ ہو گیا ہے۔ کمپنی کی جانب سے اسٹاک ایکسچینج کو بھجوائے گئے ایک سرکاری خط میں شیئرز کی منتقلی اور انتقالِ ملکیت کی تمام تر قانونی تفصیلات فراہم کر دی گئی ہیں۔

ذرائع کے مطابق، سپریم کورٹ کے احکامات کے تحت ‘بینظیر ایمپلائز اسٹاک آپشن اسکیم ٹرسٹ’ (BESOS) کے پاس موجود 20 کروڑ 57 ہزار 318 عام شیئرز اب باقاعدہ طور پر حکومتِ پاکستان کو منتقل کر دیے گئے ہیں۔ اس بڑی منتقلی کے بعد پاکستان پٹرولیم لمیٹڈ میں سرکاری شیئر ہولڈنگ جو پہلے 67.51 فیصد تھی، اب بڑھ کر 74.86 فیصد کی سطح پر پہنچ گئی ہے۔ اسکیم سے متعلق تمام شیئرز سرکاری اثاثوں میں شامل ہونے کے بعد اس اہم قومی ادارے پر حکومت کا انتظامی و مالیاتی کنٹرول پہلے سے کہیں زیادہ مضبوط اور مستحکم ہو گیا ہے۔