پاکستان میں جگر کی پیوندکاری کا عالمی ریکارڈ، 24 گھنٹے میں 10 کامیاب ٹرانسپلانٹس مکمل

پاکستان کڈنی اینڈ لیور انسٹی ٹیوٹ (PKLI) نے طب کے شعبے میں ایک اور تاریخی اور عالمی اعزاز اپنے نام کر لیا ہے، جہاں صرف 24 گھنٹوں کے قلیل وقت کے دوران 10 مریضوں کے جگر کے کامیاب ٹرانسپلانٹس مکمل کر لیے گئے ہیں۔ پاکستان میں پہلی بار دنیا کی سب سے بڑی ’10 وے لیونگ ڈونر جگر ٹرانسپلانٹ سویپ چین’ کامیابی سے مکمل کی گئی، جس کے تحت 10 ڈونرز اور 10 مریضوں پر مشتمل مجموعی طور پر 20 بڑی اور پیچیدہ سرجریز ایک ہی روز انجام دی گئیں۔

ادارے کے ترجمان کے مطابق، ڈونرز اور مریضوں کے درمیان خون یا دیگر طبی عدم مطابقت (Mismatch) کو جدید طبی حکمت عملی اور سائنسی طریقہ کار کے ذریعے زندگی بچانے کے ایک عظیم موقع میں تبدیل کیا گیا۔ اس غیر معمولی کامیابی نے دنیا بھر میں جگر کی پیوندکاری کے شعبے میں ایک نیا عالمی معیار قائم کر دیا ہے۔ پاکستان کڈنی اینڈ لیور انسٹی ٹیوٹ میں مکمل ہونے والے اس تاریخی پروگرام سے سندھ، پنجاب اور خیبرپختونخوا سے تعلق رکھنے والے مختلف مریضوں کو نئی زندگی ملی ہے۔

ادارے کی جانب سے جاری بیان میں کہا گیا ہے کہ یہ دنیا کا سب سے بڑا لیونگ ڈونر جگر ٹرانسپلانٹ سویپ پروگرام ہے، جس نے پاکستان کا نام عالمی سطح پر روشن کر دیا ہے۔ اس شاندار موقع پر پروفیسر فیصل ڈار نے جراحی کرنے والی پوری طبی ٹیم اور قوم کو مبارکباد دیتے ہوئے کہا کہ یہ کامیابی پاکستان اور انسانیت دونوں کے لیے ایک تاریخی اعزاز ہے۔ انہوں نے مستقبل میں مریضوں کی سہولت کے لیے قومی سطح پر ایک مستقل ‘سویپ جگر ٹرانسپلانٹ پروگرام’ قائم کرنے کی تجویز بھی پیش کی۔