قطر آبنائے ہرمز پر فیس لگانے کے ایرانی منصوبے کی حمایت نہیں کرے گا، قطری وزیراعظم کا اعلان

قطر کے وزیراعظم شیخ محمد بن عبدالرحمان الثانی نے واضح الفاظ میں کہا ہے کہ ان کا ملک آبنائے ہرمز سے گزرنے والے بحری جہازوں پر فیس یا ٹول عائد کرنے کے کسی بھی ایرانی منصوبے کی حمایت نہیں کرے گا۔ ایک برطانوی اخبار کو انٹرویو دیتے ہوئے قطری وزیراعظم نے تاکید کی کہ دنیا تک ہماری رسائی کے واحد اور اہم ترین راستے پر کسی دوسرے ملک کا کنٹرول ہمیں کسی صورت قابل قبول نہیں ہوگا۔ انہوں نے کہا کہ اگر ایران نے فیس کی وصولی کا کوئی مجوزہ ماڈل پیش بھی کیا، تو انہیں پہلے اس کے حق میں ٹھوس دلائل دینا ہوں گے اور قطر اس ماڈل کا باریک بینی سے جائزہ لے گا، تاہم اصولاً قطر اس اقدام کے خلاف ہے۔

شیخ محمد بن عبدالرحمان الثانی نے آبنائے ہرمز میں بحری آمدورفت کی بحالی اور سیکیورٹی برقرار رکھنے کے لیے امریکہ اور ایران کے درمیان ہاٹ لائن کے قیام کو انتہائی اہم قرار دیا۔ ان کا کہنا تھا کہ اس ہاٹ لائن کا بنیادی مقصد غلط معلومات کے پھیلاؤ اور کسی بھی ممکنہ اشتعال انگیزی کو بروقت روکنا ہے، کیونکہ کچھ عناصر خطے میں ہونے والے معاہدوں کو سبوتاژ کرنے کی کوشش کر سکتے ہیں۔ انہوں نے تجویز دی کہ جہازوں کو ملنے والی کسی بھی قسم کی دھمکی کی فوری طور پر براہِ راست ایران سے تصدیق کی جانی چاہیے۔ اپنی معاشی سرگرمیوں کا ذکر کرتے ہوئے قطری وزیراعظم نے امید ظاہر کی کہ اگلے 30 دنوں میں بحری سرگرمیاں جنگ سے پہلے کی سطح پر واپس آ جائیں گی۔ انہوں نے مزید کہا کہ قطر چند ہفتوں میں ایل این جی (LNG) کی پیداوار کو معمول پر لانے کا ارادہ رکھتا ہے، تاہم یہ سب کچھ آبنائے ہرمز کی صورتحال معمول پر آنے سے مشروط ہے۔