قائم مقام صدر آزاد کشمیر چوہدری لطیف اکبر کے کاغذات نامزدگی مسترد

آزاد جموں و کشمیر قانون ساز اسمبلی کے عام انتخابات 2026 کے سلسلے میں مختلف حلقوں میں کاغذاتِ نامزدگی کی سکروٹنی (جانچ پڑتال) کا عمل تیزی سے جاری ہے۔ اس دوران ایک بڑی سیاسی پیش رفت سامنے آئی ہے جہاں آزاد کشمیر کے قائم مقام صدر چوہدری لطیف اکبر کے کاغذاتِ نامزدگی ریٹرننگ آفیسر نے مسترد کر دیے ہیں۔

ذرائع کے مطابق، چوہدری لطیف اکبر کے کاغذاتِ نامزدگی کو ان کے سیاسی مخالف اور حلقے کے امیدوار ثاقب مجید راجہ کی جانب سے چیلنج کیا گیا تھا۔ درخواست گزار نے ریٹرننگ آفیسر کے سامنے مؤقف اختیار کیا کہ چوہدری لطیف اکبر اس وقت ریاست کے اعلیٰ ترین آئینی عہدے (قائم مقام صدر) پر فائز ہیں، اور قانون کے تحت اس حیثیت میں وہ انتخابی عمل میں بطور امیدوار حصہ لینے کے اہل نہیں ہیں۔

ریٹرننگ آفیسر نے اس تحریری درخواست پر دونوں فریقین کے وکلاء کے تفصیلی دلائل سنے۔ چوہدری لطیف اکبر کی جانب سے چوہدری شوکت ایڈووکیٹ نے ان کا دفاع کرتے ہوئے قانونی دلائل پیش کیے۔ تاہم، بحث مکمل ہونے کے بعد ریٹرننگ آفیسر نے فیصلہ سناتے ہوئے اعتراضات کو درست تسلیم کیا اور قائم مقام صدر کے کاغذاتِ نامزدگی مسترد کر دیے۔ دوسری جانب، مظفرآباد سمیت آزاد کشمیر کے دیگر حلقوں میں الیکشن کمیشن کی جانب سے امیدواروں کے کاغذات کی جانچ پڑتال کا عمل شیڈول کے مطابق جاری ہے۔