ایران، امریکا کشیدگی: قطر اور چین کی فریقین سے تحمل کا مظاہرہ کرنے کی اپیل

ایران اور امریکہ کے درمیان ایک بار پھر بڑھتی ہوئی شدید کشیدگی پر قطر اور چین نے گہری تشویش کا اظہار کرتے ہوئے تمام فریقین سے تحمل کا مظاہرہ کرنے اور سفارتی مذاکرات جاری رکھنے کی اپیل کی ہے۔ خبر رساں ادارے کے مطابق، قطر نے ایران کی جانب سے کویت اور بحرین پر کیے گئے حملوں کی سخت الفاظ میں مذمت کرتے ہوئے انہیں علاقائی امن و استحکام کے لیے شدید نقصان دہ قرار دیا ہے۔ قطری وزارتِ خارجہ نے اپنے بیان میں زور دیا کہ خطے کو ان بلاجواز حملوں کے نتائج سے بچانے کے لیے ایران اور امریکہ کے درمیان طے پانے والی مفاہمتی یادداشت کے تحت سفارت کاری کا راستہ اختیار کیا جائے۔ دوسری جانب، امریکی فوج کی جانب سے ایران میں متعدد اہداف پر کیے گئے فضائی حملوں کے بعد چین نے بھی مشرقِ وسطیٰ کی صورتحال پر تشویش کا اظہار کیا ہے۔ چینی وزارتِ خارجہ کی ترجمان ماؤ نِنگ نے بیجنگ میں میڈیا بریفنگ کے دوران واضح کیا کہ مشرقِ وسطیٰ میں جنگ کو دوبارہ بھڑکانا کسی کے مفاد میں نہیں ہے اور عسکری کارروائیاں مسائل کا حل نہیں ہو سکتیں، لہٰذا دونوں ممالک تحمل سے کام لیتے ہوئے اختلافات کو بات چیت کے ذریعے حل کریں۔