ایران امریکا مذاکرات کا نیا دور، امریکی نیوز ویب سائٹ کا بڑا دعویٰ سامنے آگیا

امریکی نیوز ویب سائٹ نے دعویٰ کیا ہے کہ امریکہ اور ایران کے درمیان حالیہ شدید کشیدگی کو کم کرنے کے لیے سفارتی کوششیں تیز ہو گئی ہیں اور دونوں ممالک کے مابین مذاکرات کا نیا دور آئندہ ہفتے متوقع ہے، جس کے سوئٹزرلینڈ میں منعقد ہونے کا امکان ظاہر کیا جا رہا ہے۔ رپورٹ کے مطابق، دو روز تک جاری رہنے والے حملوں کا سلسلہ فی الحال تھم گیا ہے۔ امریکی میڈیا کا کہنا ہے کہ قطر، پاکستان، مصر اور سعودی عرب کے اعلیٰ حکام نے امریکی اور ایرانی حکام سے اہم ٹیلیفونک رابطے کیے ہیں تاکہ دونوں ممالک کے درمیان جاری شدید تناؤ کو کم کیا جا سکے۔ ثالثی کے عمل میں شامل معتبر ذرائع کے مطابق، ان مختلف ممالک کی مشترکہ سفارتی کوششوں کا بنیادی مقصد امریکہ اور ایران کی تکنیکی ٹیموں کے درمیان مذاکرات کے اگلے دور کی حتمی تاریخ طے کرنا ہے، تاکہ اس سنگین تنازع کا پرامن حل بات چیت کے ذریعے تلاش کیا جا سکے۔

رپورٹ میں مزید کہا گیا ہے کہ اگر موجودہ پسِ پردہ سفارتی کوششیں کامیاب رہیں تو دونوں ممالک کے درمیان مذاکرات کا نیا مرحلہ آئندہ ہفتے سوئٹزرلینڈ میں شروع ہو جائے گا۔