امریکا کا ایرانی پاسداران انقلاب کے ساتھ براہِ راست رابطہ قائم کرنے پر اتفاق

امریکی نائب صدر جے ڈی وینس نے انکشاف کیا ہے کہ امریکا نے مشرقِ وسطیٰ میں جاری شدید کشیدگی کو کم کرنے کے لیے ایرانی پاسدارانِ انقلاب (IRGC) کے ساتھ ایک باقاعدہ اور براہِ راست رابطہ چینل قائم کرنے پر اتفاق کر لیا ہے۔ایک خصوصی انٹرویو کے دوران امریکی نائب صدر جے ڈی وینس نے بتایا کہ اس نئے سفارتی و فوجی انتظام کے تحت ایرانی اور امریکی اعلیٰ فوجی حکام قطر کے دارالحکومت دوحہ میں اہم ملاقاتیں کریں گے، جہاں وہ خطے میں پیدا ہونے والے باہمی تنازعات اور غلط فہمیوں کو حل کرنے کی کوشش کریں گے۔

رابطے کے طریقہ کار کی وضاحت کرتے ہوئے جے ڈی وینس نے کہا کہ ایرانی حکام نے اس پیش رفت کا مثبت جواب دیا ہے۔ ایرانی حکام نے مطلع کیا ہے کہ وہ پاسدارانِ انقلاب کا ایک اعلیٰ نمائندہ دوحہ بھیجیں گے، جو امریکی سینٹرل کمانڈ (CENTCOM) کے ایک ذمہ دار اہلکار کے ساتھ بیٹھ کر زمینی معاملات کو طے کرے گا۔ انہوں نے امید ظاہر کی کہ اس براہِ راست چینل کے ذریعے دونوں ممالک کے درمیان بہت سے سنگین تنازعات کو بروقت حل کرنے میں مدد ملے گی۔امریکی نائب صدر نے انٹرویو میں مزید بتایا کہ خطے کی بدلتی صورتحال میں متحدہ عرب امارات (UAE) نے بھی ایران کے ساتھ ایسے سفارتی اور تزویراتی رابطے قائم کیے ہیں، جو اس سے پہلے کبھی موجود نہیں تھے۔ ان رابطوں میں ایرانی پاسدارانِ انقلاب کے ساتھ براہِ راست بات چیت بھی شامل ہے۔انہوں نے واضح کیا کہ متحدہ عرب امارات اس وقت ایرانی حکام کے ساتھ ایسے اعلیٰ سطحی مذاکرات کر رہا ہے جن کی ماضی میں کوئی مثال نہیں ملتی، اور یہ خطے میں امن و امان کی بحالی کے لیے ایک اہم سنگِ میل ثابت ہو سکتے ہیں۔