روس کی ایران کو امریکی اہداف کی نشاندہی میں معاونت پر امریکا کی تحقیقات

امریکی انٹیلی جنس تجزیہ کار اس بات کی تحقیقات کر رہے ہیں کہ آیا روس نے خلیجی ممالک میں قائم سی آئی اے (CIA) کی تنصیبات پر ڈرون حملوں کے لیے ایران کو اہداف کی نشاندہی یا جدید ڈرون ٹیکنالوجی فراہم کی تھی۔ برطانوی خبر ایجنسی کے مطابق 2026 کے اوائل میں ریاض میں امریکی سفارت خانے اور مشرقی عراق میں واقع کم از کم 2 سی آئی اے مراکز کو ایرانی شاہد ڈرونز کے جدید ورژنز سے نشانہ بنایا گیا تھا۔ رپورٹ کے مطابق غیر معمولی درستی سے کیے گئے ان ڈرون حملوں، اور اس کے بعد اردن میں امریکی فضائی اڈے پر بیلسٹک میزائل حملے جس میں 2 امریکی فوجی ہلاک ہوئے، نے واشنگٹن میں روسی مداخلت کے خدشات کو مزید بڑھا دیا ہے۔ تاہم، امریکی حکام فی الحال حتمی نتیجے پر نہیں پہنچے ہیں۔