امریکا میں شدید گرمی کے باعث یومِ آزادی کی تقریبات کے پلان تبدیل، درجہ حرارت 100 ڈگری سے تجاوز کرنے کی پیشگوئی

امریکا میں پڑنے والی شدید گرمی اور ہیٹ ویو کی لہر کے باعث مختلف اضلاع اور انتظامیہ کو یومِ آزادی (4 جولائی) کی مناسبت سے کی جانے والی اپنی پیشگی تیاریوں اور پلانز میں تبدیلیاں کرنے پر مجبور ہونا پڑا ہے۔

خطے بھر میں گرمی کے خدشات کے پیش نظر انتظامیہ تقریبات کے شیڈول تبدیل کر رہی ہے۔ حکام کا کہنا ہے کہ امریکی دارالحکومت واشنگٹن میں ہونے والے مشہور ‘اے کیپیٹل فورتھ’ کنسرٹ کے لیے جمعہ کی رات پبلک گیٹس اب گرمی کی غیر معمولی شدت کے باعث تاخیر سے، یعنی شام 7 بجے کھولے جائیں گے۔ تاہم، کنسرٹ اپنے طے شدہ وقت کے مطابق رات 8 بجے ہی شروع ہوگا۔

نیشنل ویدر سروس (امریکی محکمہ موسمیات) نے خبردار کیا ہے کہ خطے میں موسمی حالات انتہائی خطرناک ہو سکتے ہیں اور درجہ حرارت 100 ڈگری فارن ہائیٹ (قریب 38 ڈگری سینٹی گریڈ) سے تجاوز کرنے کی پیشگوئی کی گئی ہے۔ اس صورتحال کو مدنظر رکھتے ہوئے یونائیٹڈ اسٹیٹس کیپیٹل پولیس نے تقریب میں آنے والے مہمانوں پر زور دیا ہے کہ وہ اپنے ساتھ وافر مقدار میں پانی لائیں۔ انتظامیہ نے واضح کیا ہے کہ شیشے کے علاوہ دیگر میٹریل سے بنی پانی کی بوتلیں اور کولرز اندر لانے کی اجازت ہوگی، جبکہ سیکیورٹی اسکریننگ کے عمل کو تیز بنانے کے لیے شہریوں سے اپیل کی گئی ہے کہ وہ اضافی سامان لانے سے گریز کریں۔

حکام نے شدید گرمی سے متاثر ہونے کے زیادہ خطرے سے  بزرگوں اور بچوں کو اضافی احتیاط برتنے کا مشورہ دیا ہے۔ انتظامیہ کا کہنا ہے کہ جو لوگ گرمی کی وجہ سے تقریب میں ذاتی طور پر شرکت نہیں کر سکتے، ان کے لیے یہ کنسرٹ پبلک ٹیلی ویژن اسٹیشنز پر براہِ راست نشر کیا جائے گا اور اس کی آن لائن اسٹریمنگ بھی دستیاب ہوگی۔