ایران کو اپنے غلط فیصلوں کی قیمت چکانی پڑ رہی ہے: امریکی وزیرِ دفاع

امریکی وزیرِ دفاع پیٹ ہیگستھ نے ایران کے خلاف جاری فوجی کارروائیوں پر سخت تبصرہ کرتے ہوئے کہا ہے کہ ایران کو اپنے غلط فیصلوں کی بھاری قیمت چکانی پڑ رہی ہے۔ سوشل میڈیا پلیٹ فارم ‘ایکس’ (سابقہ ٹویٹر) پر اپنے ایک بیان میں امریکی وزیرِ دفاع نے امریکی سینٹرل کمانڈ (سینٹ کام) کا اعلامیہ شیئر کرتے ہوئے لکھا کہ “ایران نے غلط فیصلہ کیا، اب اسے اس کی قیمت چکانی پڑے گی۔”

یہ بیان ایک ایسے وقت میں سامنے آیا ہے جب امریکی سینٹرل کمانڈ نے ایران کے خلاف فوجی حملوں کے تیسرے مرحلے کا باضابطہ آغاز کر دیا ہے۔ سینٹ کام کے مطابق، اس تازہ ترین مرحلے میں امریکی افواج نے ایران کے اندر 140 اسٹریٹجک اور فوجی اہداف کو کامیابی سے نشانہ بنایا ہے۔

دوسری جانب، خطے میں کشیدگی اس وقت مزید سنگین رخ اختیار کر گئی جب ایرانی پاسدارانِ انقلاب کی بحریہ نے دنیا کی اہم ترین تجارتی آبی گزرگاہ ‘آبنائے ہرمز’ کو اگلے حکم اور خطے سے امریکی مداخلت کے مکمل خاتمے تک بند کرنے کا اعلان کیا۔ ایران نے واضح کیا ہے کہ اس دوران کسی بھی تجارتی یا بحری جہاز کو یہاں سے گزرنے کی اجازت نہیں دی جائے گی۔

آبنائے ہرمز کی بندش کے ساتھ ہی ایران نے مشرقِ وسطیٰ میں امریکی ٹھکانوں پر جوابی کارروائی کا دعویٰ بھی کیا ہے۔ ایرانی افواج کا دعویٰ ہے کہ انہوں نے قطر، متحدہ عرب امارات (یو اے ای)، کویت، بحرین، اردن اور عمان میں موجود امریکی اہداف کو نشانہ بنایا ہے، جس میں ایک امریکی کمانڈ سینٹر کو تباہ کرنے کا دعویٰ بھی شامل ہے۔ خطے میں جاری یہ شدید ترین فوجی تصادم اب ایک باقاعدہ علاقائی جنگ کی شکل اختیار کرتا جا رہا ہے۔