ایران میں آپریشن کا نیا مرحلہ: میزائل سازی کی صلاحیت ختم کر دیں گے، امریکی وزیرِ دفاع پیٹ ہیگسیتھ

امریکی وزیر جنگ پیٹ ہیگسیتھ نے کہا ہے کہ ایران میں آپریشن کامیابی سے آگے بڑھ رہا ہے، اگلے مرحلے میں ایران کی میزائل پیداواری صلاحیت ختم کردیں گے۔ جنگ دو ماہ یا زیادہ بھی جاری رہ سکتی ہے۔ پیٹ ہیگسیتھ نے پینٹاگون میں پریس بریفنگ میں بتایا کہ جنگ ایک نئے اور اہم مرحلے میں داخل ہورہی ہے اور امریکی فورسز کو نمایاں برتری حاصل ہورہی ہے۔ امریکی افواج بتدریج ایرانی فضائی اور بحری حدود پر کنٹرول حاصل کررہی ہیں۔ انہوں نے کہا کہ پاسدارانِ انقلاب کو امریکی فوجی طاقت کے بارے میں شدید غلط فہمی تھی۔ ایران کو یقین تھا کہ امریکا اس جنگ کو آگے نہیں بڑھا سکے گا تاہم حالات اس کے برعکس ثابت ہورہے ہیں۔ پیٹ ہیگستھ کے مطابق امریکی فوج کے پاس جدید ہتھیاروں اور اسلحے کا وسیع ذخیرہ موجود ہے، جس کی بدولت مزید کارروائیوں کی بھرپور صلاحیت موجود ہے۔ انہوں نے واضح کیا کہ جنگ کی رفتار اور دورانیہ امریکا خود طے کرے گا۔ یہ جنگ چار ہفتے، آٹھ ہفتے یا اس سے بھی زیادہ عرصہ جاری رہ سکتی ہے۔ انھوں نے یہ دعویٰ بھی کیا کہ ایران کے ڈرون حملوں میں تیراسی فیصد کمی ہوئی ہے۔