امریکا کا چین پر ایران اور یمنی حوثیوں کو فوجی، جوہری ساز و سامان کی فراہمی کا الزام

ایران کے معاملے پر اقوامِ متحدہ کی سلامتی کونسل میں دو عالمی طاقتیں، امریکا اور چین، ایک بار پھر آمنے سامنے آگئی ہیں۔ امریکا نے بیجنگ پر براہِ راست الزام عائد کیا ہے کہ وہ ایران اور یمن کے حوثی باغیوں کو حساس فوجی اور جوہری استعمال میں آنے والا ساز و سامان فراہم کر رہا ہے۔ اقوامِ متحدہ میں امریکی مندوب مائیک والٹز نے سلامتی کونسل کے اجلاس کے دوران سخت موقف اپناتے ہوئے کہا کہ چین، ایران اور حوثیوں کو اس نوعیت کے مٹیریل اور جدید ٹیکنالوجی کی فراہمی کو روکنے کے لیے خاطر خواہ اقدامات نہیں کر رہا، جو عالمی قوانین کی سنگین خلاف ورزی ہے۔

امریکی مندوب نے مزید دعویٰ کیا کہ ایران اور حوثیوں کو سمندر اور زمین پر کارروائیوں کے لیے جدید سیٹلائٹ امیجری (فضائی تصاویر) بھی فراہم کی جا رہی ہیں، جس سے بحری جہازوں پر حملوں میں مدد مل رہی ہے۔ دوسری جانب، چین نے امریکی الزامات کو یکسر مسترد کرتے ہوئے انہیں سراسر بے بنیاد اور من گھڑت قرار دیا ہے۔ چینی مندوب نے اپنے جوابی بیان میں واضح کیا کہ بیجنگ دوہرے استعمال کے فوجی و سویلین ساز و سامان کی برآمدات پر انتہائی سخت کنٹرول اور نگرانی رکھتا ہے۔ چین نے الٹا امریکا کو کٹہرے میں کھڑا کرتے ہوئے کہا کہ ایران پر حالیہ امریکی حملوں نے پوری دنیا کو ایک انتہائی خطرناک موڑ پر لا کھڑا کیا ہے، لہٰذا واشنگٹن مشرقِ وسطیٰ میں نئے تنازعات کو ہوا دینے اور خطے میں مزید بدامنی پیدا کرنے سے باز رہے