امریکی ناظم الامور اور سفارتی مشن کی پاکستانیوں کو یومِ آزادی کی مبارکباد

پاکستان میں متعین امریکی ناظم الامور نیٹلی اے بیکر (Natalie A. Baker) اور امریکی سفارتی مشن نے یومِ آزادی کے پرمسرت موقع پر تمام پاکستانیوں اور پاکستان کے دوستوں کو دلی مبارکباد پیش کی ہے۔ امریکی سفارتخانے کی جانب سے جاری کردہ خصوصی پیغام میں اس بات پر زور دیا گیا کہ پاکستان کے قیام کے فوراً بعد اسے تسلیم کرنے والے ابتدائی ممالک میں امریکا شامل تھا، اور گزشتہ 80 برسوں کے دوران دونوں ممالک کے درمیان دوستی اور دوطرفہ تعلقات مزید مضبوط و مستحکم ہوئے ہیں۔

امریکی ناظم الامور نے اپنے تہنیتی پیغام میں پاکستانی عوام کے لیے امن، خوشی، سلامتی اور خوشحالی کی نیک تمناؤں کا اظہار کیا۔ انہوں نے کہا کہ یومِ آزادی کا موقع دونوں ممالک کے درمیان دیرینہ تعلقات، باہمی احترام اور شراکت داری کی اہمیت کو اجاگر کرتا ہے، اور امریکا مستقبل میں بھی پاکستان کے ساتھ تعاون و تعلقات کی مضبوطی کے لیے پرعزم ہے۔