امریکا کی مسلسل نویں رات ایران پر بمباری، کئی شہروں میں دھماکے

امریکی فوج کی مرکزی کمان (سینٹکام) نے اعلان کیا ہے کہ اس نے امریکی صدر کی ہدایت پر مسلسل 9ویں رات ایران کے خلاف فضائی حملوں کا مرحلہ مکمل کر لیا ہے۔ سینٹکام کی جانب سے جاری بیان کے مطابق ان شدید حملوں میں پاسدارانِ انقلاب (IRGC) کے عسکری کمانڈ سینٹرز، ایئر ڈیفنس سسٹمز، ساحلی نگرانی کے مراکز، بحری صلاحیتوں، مواصلاتی نیٹ ورکس اور میزائل و ڈرون لانچ سائٹس کو کامیابی سے نشانہ بنایا گیا ہے تاکہ آبنائے ہرمز میں تجارتی جہاز رانی پر ایرانی حملوں کی صلاحیت کو مزید کمزور کیا جا سکے۔ دوسری جانب ایرانی ذرائع ابلاغ کے مطابق تبریز، صوبہ ہرمزگان کے شہر سیریک، چابہار، کنارک اور بوشہر کے شہر خورموج سے شدید دھماکوں اور آتش زدگی کی اطلاعات موصول ہوئی ہیں۔ تبریز میں 3 بڑے دھماکے سنے گئے جہاں مبینہ طور پر میزائل اڈوں کو نشانہ بنایا گیا، جبکہ بوشہر میں پاسدارانِ انقلاب کے عسکری اڈے پر بمباری کی گئی۔ سینٹکام کا کہنا ہے کہ مشرقِ وسطیٰ میں امریکی فورسز مکمل چوکسی کے ساتھ ہر ممکنہ ردِعمل کے لیے تیار ہیں۔