ایران پر مسلسل 13ویں رات شدید فضائی حملے، اہداف مکمل کرلئے: سینٹکام

سینٹکام کے مطابق ان کارروائیوں کا بنیادی مقصد آبنائے ہرمز سے گزرنے والے تجارتی جہازوں اور شہری ملاحوں کو ایران سے لاحق خطرات کو کم کرنا ہے۔ امریکی عسکری حکام نے دعویٰ کیا ہے کہ پاسداران انقلاب کی کوششوں کے باوجود آبنائے ہرمز بین الاقوامی آمدورفت کے لیے کھلی ہے اور امریکی فوج کی نگرانی میں تجارتی جہاز معمول کے مطابق سفر کر رہے ہیں۔ بیان میں یہ بھی بتایا گیا کہ اس وقت مشرقِ وسطیٰ کے خطے میں 50 ہزار سے زائد امریکی فوجی اہلکار تعینات ہیں۔

دوسری جانب ایرانی سرکاری میڈیا کے مطابق مغربی ایران کے شہر بندر عباس، جنوبی شہر اہواز اور جزیرہ قشم میں شدید دھماکوں کی آوازیں سنی گئی ہیں۔

اس دوران امریکی صدر ڈونلڈ ٹرمپ نے ٹروتھ سوشل پر ایک بیان جاری کرتے ہوئے اعلان کیا ہے کہ بحری جہازوں یا ان کے سامان کو پہنچنے والے کسی بھی نقصان کا ازالہ امریکہ کے قبضے میں موجود منجمد ایرانی فنڈز اور اثاثوں سے کیا جائے گا۔ ٹرمپ نے مزید خبردار کیا کہ اگر آئندہ کسی تجارتی جہاز پر حملہ ہوا تو ایران کے پاور پلانٹس اور پلوں کو تباہ کر دیا جائے گا۔ انہوں نے یہ بھی اشارہ دیا کہ وہ ایران کے خلاف مزید بڑے پیمانے پر ملٹری آپریشن کا حتمی فیصلہ کرنے کے بالکل قریب ہیں۔