ایرانی حملے میں اردن میں تعینات دو امریکی فوجی ہلاک، امریکا کی تصدیق

امریکی فوج کی سینٹرل کمانڈ (سینٹ کام) نے باضابطہ طور پر اعتراف کیا ہے کہ اردن میں ایران کی جانب سے کیے گئے بیلسٹک میزائل اور ڈرون حملوں کے نتیجے میں اس کے 2 فوجی ہلاک، متعدد زخمی اور ایک اہلکار تاحال لاپتہ ہے۔ سینٹ کام کی جانب سے جاری کردہ آفیشل بیان کے مطابق، 17 جولائی کو اردن میں امریکی سینٹرل کمانڈ اور اس کے اتحادی دستے ایرانی بیلسٹک میزائلوں اور ڈرون حملوں کے خلاف دفاعی کارروائی میں مصروف تھے کہ اس دوران یہ جانی نقصان ہوا۔ بیان میں مزید کہا گیا ہے کہ ہلاک ہونے والے فوجیوں کے اہل خانہ کو باضابطہ طور پر مطلع کیے جانے کے 24 گھنٹے بعد ان اہلکاروں کی شناخت دنیا کے سامنے ظاہر کی جائے گی۔

دوسری جانب، امریکی حکام نے بتایا کہ حملے میں معمولی زخمی ہونے والے 4 امریکی فوجیوں کو فوری طبی امداد کے لیے اردن کے ہسپتالوں میں منتقل کیا گیا تھا، جنہیں ابتدائی علاج کے بعد فارغ کر دیا گیا ہے اور وہ دیگر معمولی زخمی اہلکاروں کی طرح دوبارہ اپنی فوجی ذمہ داریاں سنبھال چکے ہیں۔

واضح رہے کہ ایرانی پاسدارانِ انقلاب نے اردن میں قائم امریکا کی اہم ‘الازرق ایئر بیس’ کو بڑے پیمانے پر میزائلوں اور ڈرونز سے نشانہ بنانے کا دعویٰ کیا تھا۔ ایرانی فورسز کے مطابق، اس شدید حملے میں امریکی بیس پر موجود 2 فائٹر جیٹس اور 3 امریکی طیارے مکمل طور پر تباہ ہوئے، جبکہ فائٹر جیٹ شیلٹرز اور پارکنگ ریمپس کو بھی شدید نقصان پہنچا۔ روسی میڈیا نے اس حوالے سے رپورٹ دی ہے کہ ایرانی حملے سے قبل الازرق بیس سے امریکی فوجیوں کا انخلا نہیں کرایا جا سکا تھا، جس کی وجہ سے یہ جانی و مالی نقصان ہوا۔