امریکی حملوں میں 30 سے زائد شہری اور 7 فوجی شہید، ایران کا بھرپور جواب دینے کا اعلان

ایرانی حکام نے تصدیق کی ہے کہ گزشتہ چند دنوں کے دوران جنوبی ایران پر ہونے والے امریکی حملوں میں 30 سے زائد عام شہری جاں بحق ہو گئے ہیں۔ ایرانی حکومت کی ترجمان فاطمہ مہاجرانی نے سوشل میڈیا پر جاری اپنے بیان میں اس جانی نقصان پر سوگوار خاندانوں سے تعزیت کا اظہار کرتے ہوئے کہا کہ حکومت اپنی پوری طاقت کے ساتھ عوام کے ساتھ کھڑی ہے۔ دوسری جانب ایرانی فوج نے دعویٰ کیا ہے کہ امریکہ کی جانب سے جنوب مشرقی ایران کے صوبے سیستان و بلوچستان میں ایرانشہر کے قریب واقع بمپور گیریژن پر بزدلانہ میزائل حملہ کیا گیا ہے، جس میں 388 ویں بریگیڈ کے کم از کم 7 فوجی اہلکار شہید اور متعدد زخمی ہو گئے ہیں۔ ایرانی خبر رساں ایجنسی ‘تسنیم’ کے مطابق، امریکی فوج کی جانب سے مجموعی طور پر 13 میزائل داغے گئے جنہوں نے گیریژن کے اندر فوجی بیرکوں، مہمان خانے، گارڈ پوسٹس اور رہائشی عمارتوں کو نشانہ بنایا۔ ایرانی عسکری قیادت نے اس کارروائی کو کھلی جارحیت قرار دیتے ہوئے عزم ظاہر کیا ہے کہ شہدا کے خون کا بدلہ یقینی ہے اور دیگر مسلح افواج کے تعاون سے اس کا مناسب وقت پر بھرپور جواب دیا جائے گا۔