اقوام متحدہ کی سوات میں پولیس سٹیشن کے باہر خود کش حملے کی شدید مذمت

اقوامِ متحدہ کی سلامتی کونسل نے پاکستان کے صوبہ خیبر پختونخوا کے ضلع سوات میں پولیس اسٹیشن کے باہر ہونے والے خودکش حملے کی شدید الفاظ میں مذمت کرتے ہوئے اسے گھناؤنا اور بزدلانہ فعل قرار دیا ہے۔ سلامتی کونسل کے ارکان نے اپنے جاری کردہ ایک بیان میں جاں بحق افراد کے اہل خانہ، حکومتِ پاکستان اور پاکستانی عوام سے دلی ہمدردی اور تعزیت کا اظہار کیا ہے، جبکہ زخمیوں کی جلد صحتیابی کے لیے نیک تمناؤں کا اظہار کیا۔ سلامتی کونسل نے اس بات پر زور دیا کہ دہشت گردی کی اس کارروائی کے منصوبہ سازوں، سہولت کاروں، مالی معاونین اور ذمہ دار عناصر کو ہر صورت انصاف کے کٹہرے میں لایا جائے اور تمام ممالک سے اپیل کی کہ وہ حکومتِ پاکستان کے ساتھ مکمل تعاون کریں۔ اقوامِ متحدہ نے اپنے اس عزم کا اعادہ کیا کہ دہشت گردی عالمی امن اور سلامتی کے لیے ایک سنگین خطرہ ہے جس کے خلاف تمام ریاستوں کو مل کر کارروائی کرنی چاہیے۔ یاد رہے کہ سوات میں ایک خودکش حملہ آور نے پولیس اسٹیشن کے اندر داخل ہونے کی کوشش کی تھی، تاہم مرکزی دروازے پر موجود پولیس اہلکار کی بروقت کارروائی پر اس نے خود کو دھماکے سے اڑا لیا؛ اس وقت قریب ہی ایک امن ریلی بھی جاری تھی۔