بھارت کے یکطرفہ اقدام کے باوجود جموں و کشمیر پر مؤقف تبدیل نہیں ہوا: اقوام متحدہ

اقوام متحدہ نے ایک بار پھر واضح کیا ہے کہ جموں و کشمیر کے حوالے سے عالمی ادارے کا مؤقف تبدیل نہیں ہوا اور اس تنازع کا حتمی حل اقوام متحدہ کے منشور، سلامتی کونسل کی متعلقہ قراردادوں، شملہ معاہدے اور انسانی حقوق کے مکمل احترام کے مطابق پرامن ذرائع سے نکالا جانا چاہیے۔

نیویارک میں معمول کی پریس بریفنگ کے دوران اقوام متحدہ کے سیکرٹری جنرل کے نائب ترجمان فرحان عزیز حق نے مقبوضہ جموں و کشمیر میں انسانی حقوق کی صورتحال اور 5 اگست 2019 کے بھارتی اقدامات سے متعلق سوال کا جواب دیتے ہوئے کہا کہ کشمیر کے بارے میں ہمارا مؤقف پہلے جیسا ہی ہے۔ انہوں نے وضاحت کی کہ اس تنازع پر اقوام متحدہ کا مؤقف اقوام متحدہ کے منشور اور سلامتی کونسل کی متعلقہ قراردادوں کے تحت طے ہوتا ہے، جبکہ سیکرٹری جنرل 1972 کے شملہ معاہدے کو بھی یاد دلاتے ہیں جو پاکستان اور بھارت کے درمیان دوطرفہ تعلقات کا ایک اہم فریم ورک ہے۔

سرکاری خبر رساں ادارے کی رپورٹ کے مطابق اقوام متحدہ کی جانب سے یہ بیان ایسے وقت میں سامنے آیا ہے جب پاکستان نے 5 اگست 2019 کے بھارتی اقدام کی برسی منائی۔ اس دن بھارتی وزیراعظم نریندر مودی کی حکومت نے مقبوضہ جموں و کشمیر کی خصوصی آئینی حیثیت ختم کرتے ہوئے بھارتی آئین کے آرٹیکل 370 اور 35 اے کو منسوخ کر دیا تھا۔

رپورٹ کے مطابق اس اقدام کے فوراً بعد مقبوضہ کشمیر میں مواصلاتی نظام معطل، عوامی نقل و حرکت پر سخت پابندیاں عائد اور ہزاروں اضافی بھارتی فوجی تعینات کر دیے گئے تھے۔ بعد ازاں، بھارت نے بڑی تعداد میں غیر مقامی افراد کو ڈومیسائل سرٹیفکیٹس جاری کیے جن کے ذریعے انہیں مستقل رہائش اور سرکاری ملازمتوں کا حق دیا گیا، جسے ناقدین کی جانب سے خطے کا آبادیاتی تناسب تبدیل کرنے کی منظم کوشش قرار دیا جاتا ہے۔