غزہ میں غذائی بحران شدت اختیار کرنے کا خدشہ، اقوام متحدہ کی نئی وارننگ

اقوامِ متحدہ نے غزہ میں انسانی بحران کی شدید لہر پر تشویش کا اظہار کرتے ہوئے خبردار کیا ہے کہ علاقے میں غذائی بحران انتہائی خطناک حد تک بڑھ رہا ہے۔ آئی پی سی (IPC) کی تازہد ترین رپورٹ کا حوالہ دیتے ہوئے اقوامِ متحدہ نے انتباہ کیا ہے کہ رواں سال کے آخر تک غزہ کی تقریباً 70 فیصد آبادی یعنی 14 لاکھ افراد شدید غذائی عدم تحفظ اور بھوک کا شکار ہو سکتے ہیں۔ رپورٹ میں بتایا گیا ہے کہ اپریل سے جون کے دوران ہی 12 لاکھ افراد شدید غذائی قلت کا سامنا کر چکے ہیں جبکہ اس وقت بھی 2 لاکھ 12 ہزار سے زائد شہری ہنگامی سطح کی بھوک سے نبرد آزما ہیں۔ امدادی سامان کی رسائی میں رکاوٹوں کو اس بحران کی بنیادی وجہ قرار دیتے ہوئے اقوامِ متحدہ کے سیکرٹری جنرل انتونیو گوتریس نے عالمی برادری پر زور دیا ہے کہ وہ غزہ میں بلا تعطل انسانی امداد کی فراہمی کو فوری طور پر یقینی بنانے کے لیے اپنا کردار ادا کرے۔