اقوام متحدہ کا حوثیوں کی بحیرہ احمر میں ناکہ بندی کی دھمکی پر اظہار تشویش

اقوام متحدہ نے یمن کے حوثی گروپ کی جانب سے سعودی عرب کے خلاف بحیرہ احمر (Red Sea) میں بحری ناکہ بندی کی حالیہ دھمکی پر شدید تشویش کا اظہار کیا ہے۔ اقوام متحدہ کے سیکرٹری جنرل کے ترجمان سٹیفن دوجارک نے پریس بریفنگ کے دوران کہا کہ حوثیوں کی یہ دھمکی ایک انتہائی حساس معاملے کو جنم دیتی ہے، کیونکہ بحیرہ احمر دنیا کی اہم ترین بحری گزرگاہوں میں سے ایک ہے۔

ترجمان اقوام متحدہ نے عالمی صورتحال کی نشاندہی کرتے ہوئے کہا کہ ہم پہلے ہی آبنائے ہرمز کی بندش کے منفی اثرات اور عالمی معیشت پر اس کے شدید دباؤ کو دیکھ رہے ہیں۔ انہوں نے خبردار کیا کہ اگر آبنائے ہرمز کے بعد اب بحیرہ احمر میں بھی کشیدگی بڑھتی ہے، تو اس کے نتیجے میں عالمی تجارت، بحری نقل و حمل اور بین الاقوامی معیشت پر مزید تباہ کن اور منفی اثرات مرتب ہو سکتے ہیں۔