اقوام متحدہ کا لیبیا میں جھڑپیں فوری روکنے اور ذمہ داروں کے احتساب کا مطالبہ

اقوام متحدہ کے معاونت مشن برائے لیبیا (یو این ایس ایم آئی ایل) نے مغربی شہر زاوِیہ اور صُرمان میں جاری پرتشدد جھڑپوں کی شدید مذمت کرتے ہوئے تمام فریقین سے فوری طور پر جنگ بندی اور کشیدگی کم کرنے کا مطالبہ کیا ہے۔ عالمی میڈیا کی رپورٹ کے مطابق یو این مشن نے متنبہ کیا ہے کہ ان جھڑپوں سے شہریوں کی جانیں شدید خطرے میں پڑ گئی ہیں، جس کے نتیجے میں ہلاکتیں ہوئی ہیں اور زاویہ آئل ریفائنری سمیت اہم بنیادی ڈھانچے اور نجی املاک کو بھی نقصان پہنچا ہے۔ علاوہ ازیں صُرمان میں لڑائی کے دوران متعدد قیدی فرار ہونے پر بھی تشویش کا اظہار کیا گیا ہے۔ مشن نے تمام فریقوں کو بین الاقوامی انسانی حقوق کے قوانین کی پاسداری کی ہدایت کرتے ہوئے کہا کہ گنجان آباد علاقوں میں بھاری ہتھیاروں کا استعمال ناقابل قبول ہے، جبکہ لیبیائی حکام پر زور دیا ہے کہ وہ تشدد کے ذمہ داروں کے احتساب کے ساتھ ساتھ آبادی سے بھاری ہتھیاروں کے انخلا اور شہریوں کے تحفظ کا فوری طریقہ کار وضع کریں۔