مقبوضہ کشمیر میں بھارتی ظلم و ستم کی برطانوی پارلیمنٹ میں بھی گونج

مقبوضہ جموں و کشمیر میں جاری بھارتی ظلم و ستم کی آواز برطانوی پارلیمنٹ کے ایوان میں بھی گونج اٹھی ہے۔ رکن برطانوی پارلیمنٹ لارڈ قربان حسین نے ایوان میں انسانی حقوق کی سنگین خلاف ورزیوں کو اجاگر کرتے ہوئے خبردار کیا ہے کہ مقبوضہ وادی میں حالات نسل کشی (جینوسائیڈ) کے دہانے پر پہنچ چکے ہیں۔ انہوں نے حکومت پر زور دیا کہ وہ جینو سائیڈ واچ (Genocide Watch) کی بین الاقوامی رپورٹ کی روشنی میں مقبوضہ کشمیر کی صورتحال پر اپنا واضح مؤقف پیش کرے۔ لارڈ قربان حسین نے برطانوی حکومت سے سوال اٹھایا کہ وہ ایسی تشویشناک رپورٹس کو کس قدر سنجیدگی سے لیتی ہے اور مقبوضہ کشمیر میں متوقع نسل کشی کو روکنے کے لیے برطانوی حکومت کی سطح پر کیا عملی اقدامات کیے جا رہے ہیں۔