متحدہ عرب امارات نے اقوام متحدہ کی سربراہی کیلئے لانا نسیبہ کو نامزد کر دیا

متحدہ عرب امارات (UAE) نے اقوامِ متحدہ کے اگلے سیکرٹری جنرل کے عہدے کے لیے اپنی سینئر سفارت کار اور موجودہ وزیرِ مملکت لانا زکی نسیبہ کو باضابطہ طور پر نامزد کر دیا ہے۔

اماراتی صدر شیخ محمد بن زاید آل نہیان نے اقوامِ متحدہ کی جنرل اسمبلی اور سلامتی کونسل کے صدور کو ارسال کردہ خط کے ذریعے ان کی نامزدگی پیش کی۔ اس تاریخی پیش رفت کے بعد متحدہ عرب امارات بھی اقوامِ متحدہ کی آئندہ عالمی قیادت کی دوڑ میں براہِ راست شامل ہو گیا ہے۔ صدر آل نہیان نے خط میں لانا نسیبہ کے وسیع سفارتی تجربے، عالمی چیلنجز سے نمٹنے کی صلاحیت اور بین الاقوامی تعاون کے فروغ میں ان کے کردار کو سراہا۔

لانا نسیبہ 2013 سے 2024 تک اقوامِ متحدہ میں یو اے ای کی مستقل مندوب کے طور پر خدمات انجام دے چکی ہیں۔ وہ جنرل اسمبلی کی نائب صدر، اقوامِ متحدہ برائے خواتین (UN Women) کی صدر اور سلامتی کونسل کی دو بار صدارت کا اعزاز بھی رکھتی ہیں۔ اپنی نامزدگی پر لانا نسیبہ کا کہنا تھا کہ اقوامِ متحدہ کو عالمی بحرانوں پر محض خاموش تماشائی بننے کے بجائے ان کے پائیدار حل کے لیے مؤثر سفارتی کردار ادا کرنا چاہیے۔ اس اہم نامزدگی کو خلیجی خطے کی سطح پر بھی بھرپور حمایت حاصل ہو رہی ہے۔