سمندری طوفان ڈولفن نے جاپان اور چین میں تباہی مچا دی، سیکڑوں پروازیں منسوخ

شدید سمندری طوفان “ڈولفن” نے جاپان کے بعد چین کے مشرقی ساحلی علاقوں میں تباہی مچا دی ہے۔ جاپان کے جنوبی جزیرے اوکیناوا سے گزرتے ہوئے طوفان کی تیز ہواؤں اور بارش کے باعث مختلف حادثات میں 6 افراد زخمی ہو گئے، جبکہ 50 ہزار سے زائد گھروں اور عمارتوں کی بجلی کی فراہمی منقطع ہو گئی۔ جاپان میں تباہی پھیلانے کے بعد یہ طوفان چین کی ساحلی پٹی سے ٹکرا گیا ہے، جس سے ملک کے کئی شہروں میں تیز ہواؤں کے ساتھ موسلادھار بارشوں کا سلسلہ شروع ہو چکا ہے۔

چینی محکمہ موسمیات کے مطابق صوبے جی جیانگ کے مختلف علاقوں میں 500 ملی میٹر تک ریکارڈ توڑ بارش کی پیش گوئی کی گئی ہے، جبکہ تجارتی مرکز شنگھائی میں بھی شدید طوفانی بارشوں کا الرٹ جاری کر دیا گیا ہے۔ موسم کی سنگینی کے پیش نظر شنگھائی کے دو مرکزی ہوائی اڈوں پر 1,384 پروازیں منسوخ کر دی گئی ہیں، جبکہ چین کی یانگ شان بندرگاہ پر 500 سے زائد کشتیوں کو سمندر میں جانے سے روک کر محفوظ مقامات پر منتقل کر دیا گیا ہے۔