ترکیہ کے صوبہ موغلا کے جنگلات میں آگ بھڑک اٹھی، وسیع رقبہ متاثر

ترکیہ کے جنوب مغربی صوبے موغلا کے وسیع اور سرسبز جنگلات میں اچانک خوفناک آگ بھڑک اٹھی ہے، جس نے دیکھتے ہی دیکھتے جنگل کے ایک بڑے رقبے کو اپنی لپیٹ میں لے لیا ہے۔

بین الاقوامی خبر ایجنسی کے مطابق جنگلات میں لگنے والی اس شدید آگ کے باعث فضا میں دھویں کے گھنے اور سیاہ بادل چھا گئے ہیں جنہیں دور دور سے دیکھا جا سکتا ہے۔ آگ کی شدت اور تیزی سے پھیلاؤ کے پیشِ نظر مقامی انتظامیہ اور کوسٹل سیکیورٹی و ریسکیو ٹیموں نے فوری طور پر بڑے پیمانے پر ہنگامی امدادی کارروائیاں شروع کر دی ہیں۔

ترک حکام کے مطابق آگ پر جلد از جلد قابو پانے اور اسے آبادی والے علاقوں تک پھیلنے سے روکنے کے لیے عظیم الشان ریسکیو آپریشن جاری ہے۔ اس آپریشن میں 380 سے زائد تربیت یافتہ فائر فائٹرز، 53 فائر ٹرکس اور 9 واٹر ٹینکرز زمین پر مصروفِ عمل ہیں، جبکہ فضا سے آگ بجھانے کے لیے 14 ہیلی کاپٹرز اور 5 خصوصی فائر فائٹنگ طیارے مسلسل پانی برسا کر شعلوں کو ٹھنڈا کرنے کی کوشش کر رہے ہیں۔