ایران ہر بات نہ مانا تو امریکہ وہی کرے گا جو ضروری ہوگا: ٹرمپ کا سخت لہجہ

امریکی صدر ڈونلڈ ٹرمپ نے ایران کے ساتھ جاری مذاکرات پر اہم بیان دیتے ہوئے کہا ہے کہ تہران امریکہ کے ساتھ معاملات میں بڑی رعایتیں دے رہا ہے، تاہم انہوں نے انتباہ کیا کہ اگر ایران نے طے شدہ امور پر عمل درآمد نہ کیا تو واشنگٹن وہ تمام اقدامات کرے گا جو ضروری ہوں گے۔نیٹو (NATO) چیف کے ہمراہ میڈیا سے گفتگو کرتے ہوئے صدر ڈونلڈ ٹرمپ نے دعویٰ کیا کہ ایران ان کی بات مان رہا ہے اور اسے ایسا کرنا ہی ہوگا۔ ان کا کہنا تھا کہ ایران کے ساتھ معاملات فی الحال مثبت سمت میں آگے بڑھ رہے ہیں اور آنے والے دنوں میں صورتحال مزید واضح ہو کر سامنے آ جائے گی۔

امریکی صدر نے ایران کے منجمد اثاثوں کی بحالی اور کسی بھی قسم کی مالی معاونت کی خبروں کو یکسر مسترد کر دیا۔ انہوں نے واضح کیا کہ امریکہ نے ایران کو کوئی فنڈز فراہم نہیں کیے ہیں اور نہ ہی تہران کو اس وقت ایسی کسی مالی مدد کی ضرورت ہے۔صدر ٹرمپ نے ایک اور بڑا دعویٰ کرتے ہوئے بتایا کہ ایران نے  اہم تجارتی گزرگاہ آبنائے ہرمز (Strait of Hormuz) سے گزرنے والے بحری جہازوں پر کسی بھی قسم کا اضافی ٹول یا مالی بوجھ عائد نہ کرنے کی یقین دہانی کرائی ہے۔ انہوں نے اس پیش رفت کو عالمی تجارت اور توانائی (تیل و گیس) کی بلا تعطل ترسیل کے لیے ایک انتہائی اہم اور مثبت کامیابی قرار دیا۔