ایران اس وقت امریکا سے رابطے میں ہے، معاہدہ کرنا چاہتا ہے: ٹرمپ

امریکی صدر ڈونلڈ ٹرمپ نے دعویٰ کیا ہے کہ ایران اس وقت امریکا سے رابطے میں ہے اور معاہدہ کرنے کا خواش مند ہے، جبکہ وہ خود بھی ایران کی بات سننے کے لیے تیار ہیں۔ کوریسپونڈینٹس ڈنر اور اوول آفس میں گفتگو کرتے ہوئے صدر ٹرمپ نے کہا کہ فی الحال ڈیل کا مناسب وقت نہیں آیا مگر مذاکرات کے دروازے کھلے ہیں۔ انہوں نے واضح کیا کہ ایران کو 2 راستوں (حملے جاری رکھنے یا معاہدہ کرنے) میں سے ایک کا انتخاب کرنا ہوگا، تاہم اسے کسی صورت جوہری ہتھیار حاصل نہیں کرنے دیے جائیں گے۔ ٹرمپ کے مطابق امریکی کارروائیوں سے ایران کے سیکڑوں طیارے، کشتیاں، ریڈار اور ڈرونز تباہ ہو کر اس کی بحری و فضائی طاقت ختم ہو چکی ہے۔ امریکی صدر نے یہ بھی شرط رکھی کہ اگر سعودی عرب ابراہم اکارڈ کا حصہ نہ بنا تو وہ کسی جوہری معاہدے پر دستخط نہیں کریں گے، جبکہ انہوں نے دہرایا کہ چین اور روس نے بھی ایران کو اسلحہ نہ دینے کی یقین دہانی کروائی ہے۔