اگر سعودی عرب معاہدہ ابراہیمی میں شامل نہ ہوا تو اس کیساتھ جوہری معاہدہ نہیں کریں گے: ٹرمپ کا اعلان

امریکی صدر ڈونلڈ ٹرمپ نے دو ٹوک الفاظ میں واضح کیا ہے کہ اگر سعودی عرب معاہدہ ابراہیمی (Abraham Accords) میں شامل نہیں ہوتا تو اس کے ساتھ سول جوہری معاہدہ نہیں کیا جائے گا۔ اوول آفس میں میڈیا سے گفتگو کرتے ہوئے صدر ٹرمپ نے کہا کہ امریکا اور سعودی عرب کے درمیان طے پانے والے سول جوہری معاہدے کے تحت یورینیم افزودگی کی اجازت نہیں ہوگی اور یہ صرف پرامن مقاصد کے لیے ہوگا۔ ایران جنگ سے متعلق بات کرتے ہوئے امریکی صدر نے کہا کہ انہوں نے ابھی ایران پر بڑے پیمانے پر حملے کا فیصلہ نہیں کیا کیونکہ تہران کے حکام اب مذاکرات میں زیادہ سنجیدگی کا مظاہرہ کر رہے ہیں۔ ٹرمپ کے مطابق اگرچہ انہوں نے سعودی عرب کے ساتھ سول جوہری معاہدے کی منظوری دی ہے، تاہم اس کی حتمی منظوری امریکی کانگریس سے مشروط ہوگی جس کے لیے معاہدہ ابراہیمی میں شمولیت بنیادی شرط ہے۔