پاکستان نے افغان سرزمین سے ڈرونز بھیجنا ملکی خود مختاری، سالمیت کی کھلی خلاف ورزی قرار دیدیا

پاکستان نے افغان سرزمین سے ڈرونز کے ذریعے ملک میں کی جانے والی دراندازی کی شدید الفاظ میں مذمت کرتے ہوئے اسے ملکی خودمختاری، جغرافیائی حدود اور سلامتی کی کھلی خلاف ورزی قرار دیا ہے۔ ترجمان کے مطابق پاکستان کے مستعد ایئر ڈیفنس سسٹم نے تمام درانداز ڈرونز کی بروقت نشاندہی کی اور انہیں اپنے مقررہ اہداف تک پہنچنے سے پہلے ہی فضائی حدود میں تباہ کر کے ناکارہ بنا دیا۔ پاکستان نے اپنے دفاع کے آئینی و بین الاقوامی حق کا استعمال کرتے ہوئے افغانستان کے اندر ڈرونز کی لانچنگ اور ان کے ذخیرہ کرنے کے 10 مخصوص مقامات کو نشانہ بنایا، جو تمام کے تمام مکمل طور پر تصدیق شدہ ملٹری اہداف پر مبنی اور متناسب کارروائی تھی۔

پاکستان نے افغان طالبان حکومت سے پاکستان کے خلاف جاری تمام مخالفانہ اور دہشت گردانہ سرگرمیوں کو فوری طور پر روکنے کا مطالبہ کیا ہے۔ ترجمان نے واضح کیا کہ افغان سرزمین کا پاکستان کے خلاف استعمال کسی صورت برداشت نہیں کیا جائے گا اور آئندہ ایسی کسی بھی لائحہ عمل کا فوری اور فیصلہ کن جواب دیا جائے گا۔ بیان میں کہا گیا ہے کہ پاکستان خطے میں امن اور مذاکرات کے لیے پرعزم ہے، تاہم اس خواہش کو کمزوری یا حد سے زیادہ برداشت نہ سمجھا جائے، اور عوام کی سلامتی کے لیے تمام ضروری اقدامات اٹھائے جائیں گے۔