پی ٹی آئی رہنما جنید اکبر کیخلاف نفرت انگیز تقریر پر مقدمہ درج

پی ٹی آئی رہنما جنید اکبر کے خلاف نفرت انگیز اور اشتعال انگیز تقریر کرنے کے الزام میں مقدمہ درج کر لیا گیا ہے۔ نیشنل سائبر کرائم ایجنسی (NCCA) اسلام آباد نے یہ مقدمہ سوشل میڈیا پر وائرل ہونے والے ان کے ایک ویڈیو بیان کی بنیاد پر قائم کیا ہے۔

ایف آئی آر کے متن کے مطابق، جنید اکبر نے سوشل میڈیا کے مختلف پلیٹ فارمز پر نشر ہونے والی اپنی تقریر میں سرکاری و حکومتی املاک کو نقصان پہنچانے کی کھلی دھمکیاں دیں۔ مقدمے میں مؤقف اختیار کیا گیا ہے کہ ان کی تقریر میں غارت گری اور اموات کا خدشہ پیدا کرنے کی کوشش کی گئی، جس میں انہوں نے تاریخی حملوں کی مثال دیتے ہوئے کہا کہ “جس طرح سومنات پر حملے ہوئے، اسی طرح اسلام آباد پر حملے ہوں گے”۔ سائبر کرائم ایجنسی نے اس بیان کو ریاستی نظم و ضبط کو چیلنج کرنے اور اشتعال انگیزی پھیلانے کی کوشش قرار دیتے ہوئے کارروائی کا آغاز کر دیا ہے۔